Drejtoria Rajonale e Autoritetit Kombëtar të Ushqimit, qarku Korçë, vijon monitorimin rigoroz në të gjitha subjektet e lejuara që ushtrojnë aktivitetin në këtë qark, për zbatimin e masave të marra për përballimin e situatës së krijuar nga COVID-19.
Në këtë kuadër, gjatë ditës së sotme janë kryer 23 inspektime, kryesisht në qytetin e Korçës, Maliqit dhe rrethinat e tyre, duke u inspektuar: 6 subjekte me aktivitet “Furrë buke”, 7 subjekte me aktivitet “Minimarket”, 7 subjekte me aktivitet “Njësi tregëtimi”, si dhe 3 subjekte me aktivitet “Përpunim qumështi”.
Gjatë kontrolleve të kryera, në një subjekt me aktivitet “Minimarket” u konstatuan produkte ushqimore me afat përdorimi të kaluar, të cilat u sekuestruan me destinacion asgjësimin e tyre, si dhe ndaj subjektit u mor masa administrative “Gjobë” me vlerën 300,000 lekë.
Gjithashtu, referuar shkeljeve të konstatuara në një tjetër subjekt i cili ushtronte aktivitetin “Furrë buke” në kushte të papërshtatshme higjeno-sanitare, duke cënuar sigurinë ushqimore, trupa inspektuese mori masën administrative “Gjobë” me vlerën 300,000 lekë, si dhe “Ndërprerje e menjëhershme e aktivitetit” deri në plotësimin e kushteve.
Autoriteti Kombëtar i Ushqimit do të vijojë pandërprerje monitorimet dhe kontrollet rigoroze në të gjithë vendin, me fokus mbrojtjen e shëndetit dhe jetës së konsumatorëve, duke vijuar betejën për mospërhapjen e COVID-19.
❗️ FRIKË ASPAK, KUJDES PO
