“Administratori i një subjekti ushqimor në Berat është denoncuar në polici për ushtrim dhune ndaj trupës inspektuese të AKU-së gjatë ushtrimit të detyrës së saj isnpektuese në këtë subjekt”.
Mbrojtja e shëndetit dhe jetës së konsumatorëve edhe në këtë situatë të vështirë që vendi po kalon vijon të jetë fokusi dhe qëllimi i veprimtarisë së pandalur të AKU-së. Këtë e dëshmon dhe ndërgjegjësimi dhe bashkëpunimi i qytetarëve përmes denoncimit të çdo shkelje të sigurisë ushqimore konstatuar nga ana e tyre.
Kështu, në sajë të indicios së ardhur nga konsumatorët për tregtimin e produkteve të paetiketuara në gjuhën shqipe, trupa inspektuese e Drejtorisë Rajonale të AKU, qarku Berat, në zbatim të ligjit dhe në funksion të detyrës së saj, nga inspektimin i kryer në subjektin “S. S”, konstatoj tregtimin e produkteve usqhimore të pasigurta për konsum human, pasi subjekti nuk dispononte sistemin e gjurmueshmërisë, si dhe u evidentuan 2184 shishe x 125 ml “suko pjeshkë” dhe 2112 shishe x 200ml “suko pjeshkë” në ambalazh TETRAPAC, të papajisura me etiketim në gjuhën shqipe.
Gjendur në këto kushte, përfaqësuesi i subjektit ka përkeqësuar situatën duke ushtruar dhunë ndaj inspektorëve (pamje të regjistruara nga kamerat e subjektit).
Trupa inspektuese kërkoi mbështetjen e forcave të Policisë së Shtetit, e cila shoqëroi në polici përfaqësuesin e subjektit, duke mundësuar kryerjen e inspektimit normal nga inspektorët.
Për shkeljet ligjore të konstatuara në subjekt, trupa inspektuese mori masat administrative:
- “Gjobë” me vlerën 100,000 lekë për etiketim në kundërshtim me ligjin,
- “Gjobë” me vlerën 100,000 lekë për mungesë të sistemit të gjurmueshmërisë, si dhe
- “Gjobë” me vlerën 100.000 mijë lekë për pengimin e procesit të inspektimit.
Gjithashtu, nga ana e trupës inspektuese së AKU është bërë kallëzimi pranë instancave përkatëse për dhunën e ushtruar ndaj tyre nga ana e subjektit.
Autoriteti Kombëtar i Ushqimit, në përputhje me detyrën e tij ligjore dhe në kuadër të luftës si pjesë e Task Forcës për parandalimin e përhapjes së COVID-19, nuk do të lejojë asnjë rast abuzimi me çmimet dhe sigurinë ushqimore në vend.
❗️ FRIKË ASPAK, KUJDES PO
