Drejtoresha e Përgjithshme e Autoritetit Kombëtar të Ushqimit, Znj. Jeta Deda ka zhvilluar gjatë ditës së sotme në ambientet e Drejtorisë Rajonale Lezhë, një takim pune me Kreun e Bashkisë së Lezhës, Z. Pjerin Ndreu, nga i cili mori mbështetjen institucionale, në lidhje me masat që po merren për garantimin e sigurisë ushqimore pranë dhe brenda institucioneve shkollore, bashkëpunimet dypalëshe ndërvepruese për tregjet e hapura ambulante dhe fushatave ndërgjegjësuese për mbrojtjen e shëndetit të konsumatorit.
Gjatë takimit Znj. Jeta Deda tha se, “AKU ka një vëmendje të posaçme në këtë fillim viti shkollor, në monitorimin e të gjithë operatorëve të biznesit ushqimor që ushtrojnë aktivitete pranë ose brenda institucioneve shkollore, për garantimin pa kompromis të sigurisë ushqimore”.
“Në fokus do të jetë në vazhdim edhe edukimi për sigurinë ushqimore, nisma që AKU i ka ndërmarrë më herët, në funksion të ndërgjegjësimit të fëmijëve, në këshillime mbi elementë kryesorë të sigurisë ushqimore, për të kontribuar sot dhe në të ardhmen, për një shëndet të sigurt”, tha Drejtoresha e Autoritetit Kombëtar të Ushqimit.
