Dibër, AKU konfiskon mish pa vulë dhe certifikatë veterinare
Trupat inspektuese të Autoritetit Kombëtar të Ushqimit, kanë ushtruar monitorime dhe kontrolle në Qarkun e Dibrës, në subjekte që ushtrojnë aktivitetin e therjes dhe të tregtimit të mishit.
Gjatë ushtrimit të kontrolleve në katër subjekte është konstatuar tregtim i mishit pa vulë dhe certifikatë veterinare, ushtrim i aktivitetit të tregtimit të mishit i paregjistruar në QKB, në mungesë gjurmueshmërie dhe kushteve higjieno-sanitare .
Për shkeljet e konstatuara, trupat inspektuese të AKU-së, vendosën masat administrative me gjobë në vlerën e 460.000 lekëve, janë konfiskuar rreth 1 kv produkte mishi, si dhe ndaj një subjekti u mor masa e menjëhershme e ndërprerjes së aktivitetit të paregjistruar.
Autoriteti Kombëtar i Ushqimit siguron konsumatorët, se po vijon pandërprerë kontrollet në terren në garantim të sigurisë ushqimore.
