Drejtoria Rajonale e AKU Tiranë kontroll në dy subjekte, vendosen 6 gjoba me vlerë totale 3.15 milion lekë si dhe bllokohen dhjetra kilogram produkte ushqimore me afat të kaluar përdorimi.
Autoriteti Kombëtar i Ushqimit në vijim të kontrolleve rigoroze në të gjithë vendin për mbarëvajtjen e sezonit turistik nëpërmjet garantimi të sigurisë ushqimore, ka kryer kontrolle zyrtare në dy subjekte në Rrogozhinë dhe Spille nga të cilat ka rezultuar se:
- Nga kontrolli i ushtruar në subjektin me aktivitet “Supermarket”, Rrogozhinë, u konstatua se subjekti ushtronte aktivitetin i papajisur me liçensë në veprimtarinë përkatëse “shitje me shumicë e produkteve me origjinë shtazore për njerëz (supermarket)” (kategoria II,1,B). Në momentin e kontrollit në subjekt u konstuan produkte të pa etiketuara në gjuhën shqipe (vaj misri, vaj kikiriku, majonezë, salcë domateje, makarona, miell). Gjithashtu u konstatua një sasi prej 5 kg mocarela pa etiketë dhe pa dokumentacion shoqërues si dhe një sërë produktesh ushqimore me afat të kaluar përdorimi ( çokollatë, mini Croisant etj).
Për shkeljet e konstatuara trupa inspektuese mori masat e mëposhtme:
- Gjobë 2,000,000 lekë për ushtrim të aktivitetit pa disponuar licensën përkatëse,
- Gjobë 300,000 lekë për hedhjen në treg të produkteve me afat të kaluar përdorimi,
- Gjobë 100,000 lekë për mungesë të sistemit të gjurmueshmërisë,
- Gjobë 50,000 lekë për etiketim në kundërshtim me ligjin,
- U bë bllokimi i produkteve të pasigurta për konsum me qëllim asgjesimin e tyre.
- Nga kontrolli i ushtruar në një subjekt në Spille, u konstatua se subjekti ushtron aktivitetin si qebabtore i parregjistruar (pa nipt). Aktiviteti ushtrohej në një ambjent të hapur dhe jashtë kushteve higjeno–sanitare (pajisjet që përdoreshin për gatim kishin prezencë ndryshku). Në momentin e kontrollit në subjekt u konstatuan produkte ushqimore, kryesisht pula e qofte të ambalazhuara pa dokumentacion shoqërues (faturë tatimore dhe raport analiza përkatëse apo certifikatë veterinare)
Për shkeljet e konstatuara trupa inspektuese mori masat e mëposhtme:
- Gjobë 500,000 lekë për mungesë të kushteve higjeno-sanitare,
- Gjobë 200,000 lekë për mungesë të sistemit të gjurmueshmërisë,
- U mor masa e bllokimt të menjëhershëm të aktivitetit si dhe u bë bllokimi i produkteve të konstatuara si të pasigurta për konsum.
Autoriteti Kombëtar i Ushqimit do të vijojë kontrollet për marrjen e masave për zbatimin e ligjit në të gjithë zinxhirin ushqimor me qëllim garantimin e një vere të qetë dhe të shëndetshme.
Siguria Ushqimore është sfida jonë e përbashkët dhe kërkon kontributin e gjithësecilit.
Për Sigurinë e Ushqimit që Konsumon dhe Ruajtjen e Shëndetin tënd, Bashkëpuno me AKU
info@aku.gov.al | “ShqipëriaqëDuam” | 08007575 (pa pagesë) | Tel: 042254052
