Autoriteti Kombëtar i Ushqimit në vijim të marrjes së njoftimit nga ISUV, për produktin “Salçiçe e freskët” me prani të Salmonella spp, i prodhuar nga subjekti “I R&G” i cili operon në qarkun e Elbasanit, kreu kontrollin zyrtar në subjekt, nga ku u bë bllokimi i linjës së prodhimit, si dhe ndërprerja e aktivitetit të subjektit deri në gjetjen e shkakut të kontaminimit.
Gjithashtu sasia prej 10 kg e produktit, prodhim ditor, “salçiçe e freskët”, referuar rezultatit të analizave do të qëndrojë e bllokuar me destinacion final asgjësimin.
Ndaj subjektit u vendos masë administrative, si dhe Operatori i Biznesit Ushqimor u detyrua të kryejë analiza test vetëkontrolli për produktin, nga ku vetëm në rastin kur analizat do të dalin brenda normave, do të bëhet zhbllokimi i aktivitetit, nën mbikëqyrjen e Drejtorisë Rajonale të Autoritetit Kombëtar të Ushqimit Elbasan.
