Inspektori i Përgjithshëm i Inspektoriatit Qendror, Z. Shkëlqim Hajdari zhvilloi të mërkurën në ambientet e këtij institucioni një takim me kryeinspektorët e inspektoriateve shtetërore në kuadër të bashkërendimit të punës ndërmjet këtyre inspektoriateve, për inspektimet online. I pranishëm në këtë takim, Drejtori i Autoritetit Kombëtar të Ushqimit, Z.Dritan Sejko deklaroi se “Inspektimi online rrit transparencën dhe përgjegjësinë përpara trupave tona të inspektimit. Rrit profesionalizmin dhe mbi të gjitha do të nxjerrë në pah edhe të metat e sistemit tonë”. Më tej Z.Sejko shprehu besimin në këtë projekt, duke theksuar se “ Kjo është e vetmja mënyrë që të kemi rezultate frytdhënëse”.
Në të njëjtën linjë qëndroi edhe Kryeinspektori Z.Hajdari duke u shprehur se “Me inspektimin online do të jemi më të besueshëm për biznesin”, duke ritheksuar rëndësinë e këtij projekti Z.Hajdari tha se “ Pas Tiranës, inspektimi online do të mbulojë të gjithë vendin”. Sipas tij, kjo është e vetmja mënyrë për të normalizuar tregun, që të mos ketë dëme financiare.
Menjëherë pas takimit u krye një inspektim online nën drejtimin metodologjik të Inspektoratit Qendror, pranë një operatori biznesi në kryeqytet, nga ana e grupeve të Inspektimit të tre Inspektorateve Shtetërore: Autoritetit Kombëtar të Ushqimit; Inspektoratit Shtetëror të Punës dhe Shërbimeve Shoqërore; dhe të Inspektoratit Shtetëror të Shëndetësisë.
16/02/2017
