Drejtoria Rajonale e AKU-së Tiranë, në bashkëpunim me Krimin Ekonomik në Drejtorinë e Policisë Tiranë, ka bllokuar një sasi sallami të llojit “Wudy” për mungesë dokumentacioni gjurmueshmërie. Inspektorët e DRAKU Tiranë, kanë bllokuar gjatë një inspektimi më datë 17.05.2016, sasinë prej 3044 kg sallam “Wudy” për mungesë gjurmueshmërie dhe dokumentacioni, në subjektin e magazinës frigoriferike “Ismet Darsi” në rrugën Butrinti, në Laknas të Tiranës.
Nga inspektimi rezultoi se, në këtë subjekt nuk kishte kushte të ruajtjes dhe të tregtimit të produkteve ushqimore, mungesë dokumentacioni të gjurmueshmërisë për produktin sallam “Wudy” dhe dokumentacione gjurmueshmërie për produkte të tjera ushqimore. Si pasojë, u mor masa e bllokimit të sasisë 3044 kg sallam të llojit “Wudy” dhe gjobë administrative me vlerën 100.000 lekëve.
Nga kontrollet në dy tregjet më të njohura të Vlorës, ai i Orizit dhe i Çoles, inspektorët e AKU-së bllokuan një sasi vezësh që tregtoheshin jashtë kushteve higjeno-sanitare dhe nuk kishin dokument shoqerues, disa pako me fruta të thata të ambalazhuara, që nuk përmbanin etiketë dhe peshk, që mbahej për tregtim jashtë çdo kushti të përshtatshëm. Inspektimi u shtri edhe në dyqanet e tregtimit të mishit. Ndaj dy subjekteve që nuk plotësonin kushtet higjeno-sanitare u mora masa e bllokimit të aktivitetit, u vendosen gjoba me nga 100.000 lek secila, si dhe u sekustruan rreth 35 kg mish i pavulosur.
23/05/2016
