Opinioni

Agjencia Italiane për promovimin dhe ndërkombëtarizimin e kompanive italiane në bashkëpunim edhe me Konfindustrinë italiane , organizuan më 19 shkurt 2018 forumin e biznesit Itali –Shqipëri, një mision sipërmarrjesh italiane me udhëheqje politike. Ky mission u promovua nga Ministria Italiane e Zhvillimit Ekonomik nën sipërmarrjen e drejtëpërdrejtë të nënsekretarit Italian për Zhvillim Ekonomik Ivan Scalfarotto. . Sektorët në fokus të kësaj nisme ishin infrastruktura, energjia e rinovueshme, mekanizmi i bujqësisë dhe përpunimi dhe paketimi i ushqimit.

Në forumin e biznesit Itali-Shqipëri i pranishëm ishte edhe Kryeministri Edi Rama, ministra të kabinetit qeveritar, Ministri i Bujqësisë dhe Zhvillimit Rural Niko Peleshi si dhe Drejtori i Përgjithshëm i Autoritetit Kombëtar të Ushqimit Z.Agim Ismaili.

http://www.albaniaitaly2018.ice.it/

opinion

E plotë fjala e Drejtorit të Përgjithshëm të Autoritetit Kombëtar të Ushqimit Z.Agim Ismaili

Paraprakisht shpreh falenderimet për ftesën në këtë event të rëndësishëm dhe kënaqësinë të përcjellim në një tryezë kaq miqësore gjykimet e qëndrimet tona lidhur me çështjen që diskutohet.

AKU është krijuar si pjesë përbërëse e një programi për të krijuar dhe garantuar sistemin e sigurisë ushqimore në Shqipëri dhe është përgjegjës për kontrollin e zbatimit të legjislacionit që ka të bëjë me sigurinë e ushqimore dhe mbrojtjen e konsumatorit. Ne jemi duke punuar për të implementuar sistemet e sigurisë ushqimore njësoj si në Europë. Para së gjithash kjo kërkesë më shumë se detyrim ligjor, është detyrim ndaj qytetarëve

Arritja e standardeve të sigurisë ushqimore është edhe një domosdoshmëri për t’u arritur në kuadër të përgatitjeve për hapjen e negociatave për në BE.

E dimë që kapitulli për çështjet e sigurisë ushqimore është ndër çështjet më të vështira në procesin e negociimit dhe të përshtatjes së Shqipërisë për të hyrë në BE.

Në këtë kontekst po marrim që tani masat për të përgatitur edhe operatorët e biznesit me kërkesat dhe standardet që parashikohen si në legjislacionin vendas ashtu dhe në atë ndërkombëtar, Në të njëjtën kohë po përpiqemi për të përshtatur mentalitetin dhe ritmin e punës të gjithë institucionit të AKU me filozofinë e këtyre standardeve, po punojmë për të përmirësuar të gjithë sjelljen administrative dhe etikën profesionale të punonjësve të AKU përballë biznesit;

Unë besoj se pikërisht ky mentalitet i munguar në institucionin e AKU-së është një faktor kyç që ka prodhuar edhe prapambetjen në sektorin e biznesit, në drejtim të zbatimit të standardeve të sigurisë ushqimore.

Qeveria e ka vendosur prioritet sigurinë ushqimore edhe për faktin se ne duam të hapim eksportin e produkteve shqiptare, duke e konsideruar atë (eksportin e prodhimeve ushqimore) si një ndër motorët më të rëndësishëm të rritjes ekonomike të vendit.

Në këtë kontekst besojmë që është e arritshme që të hapim eksportin e produkteve blegtorale, e cila nga ana saj do të jetë një atraksion i investimeve të huaja, pasi jemi koshientë se shumë investitorë të huaj dhe kryesisht italianë janë frenuar në investimet e tyre , pikërisht për shkak të faktit se produktet me origjinë blegtorale apo me ndonjë përbërës të kësaj natyre nuk mund të eksportohen jo vetëm në Europë, por as në vendet e rajonit.

Jemi të vendosur të zbatojmë me rigorozitet e madje me rreptësi (siç parashikohet në ligj) kërkesat ligjore e ndëshkimin e shkelësve të tyre , pasi bëhet fjalë për ushqim dhe toleranca e çdo rasti, në ndryshim me çdo shkelje të natyrave të tjera, prodhon pasoja të padiskutueshme në grupe të caktuara konsumatorësh.

Kjo mënyrë të vepruari është e sigurtë që do garantojë një konkurueshmëri, e cila në vetvete do të përbëjë një stimul më shumë për të investuar në Shqipëri.

Së fundmi një sistem i besueshëm i sigurisë ushqimore , përveçse i dobishëm në radhë të parë për qytetarët, do të shërbejë për rritjen e imazhit të produkteve shqiptare dhe natyrshëm që askush më mire se biznesmenët, nuk di ta kthejë imazhin e mire edhe në sukses ekonomik e të ardhura të shtuara.

E konceptojmë vendosjen e standardeve të sigurisë ushqimore ,si pjesë e aksionit të përmirësimit të klimës të të bërit biznes në Shqipëri.